Cuireann an tUachtarán Ó hUigínn a lámh leis an mBille um Pleanáil agus Forbairt 2023
Dáta: Déa 17th Dei, 2024 | 10:17
Tar éis dó a mhachnamh a dhéanamh ar gach gné bhunreachtúil ábhartha den Bhille um Pleanáil agus Forbairt 2023 agus, tar éis dó na roghanna uile atá ar fáil dó a chur san áireamh, chuir an tUachtarán a lámh leis an mBille inniu.
Choinnigh an tUachtarán súil ghéar ar an mBille agus é á rith trí dhá Theach an Oireachtais, agus d’éist sé go cúramach leis an díospóireacht agus na saincheisteanna a ardaíodh ina leith ag gach céim, lena n-áirítear go háirithe an plé ar cheart bunreachtúil an tsaoránaigh ar rochtain ar cheartas agus saincheisteanna imréitigh a d’fhéadfadh a bheith ann le Coinbhinsiún Aarhus.
Cé gur chuir an tUachtarán na hábhair imní tábhachtacha a ardaíodh sa phlé ar an mBille san áireamh agus é i mbun machnaimh, ba í an cheist a bhí faoina bhráid ná oiriúnacht maidir le soiléiriú a dhéanamh ar Airteagal 26.1.1 le dul i ngleic le, cuir i gcás, an bac a d’fhéadfadh a bheith ann de bharr athruithe ar an gceart bunreachtúil rochtana a fháil ar na Cúirteanna agus/nó an ceart chun dlíthíochta. Is í a conclúid an Uachtaráin ná gurbh fhearr saincheisteanna dá leithéid a mheas ar bhonn fíriciúil, ní ar bhonn teibí amháin.
Sa chás seo, tá an tUachtarán den tuairim go ndéanfaí tástáil níos oiriúnaí ar aon cheist a ardaítear maidir le míbhunreachtúlacht fhorálacha an Bhille um Pleanáil agus Forbairt 2023, trí chinneadh a dhéanamh bunaithe ar fhaisnéis chruthaithe, in ionad é a bheith molta de réir Airteagal 26.
Nuair a bhíonn machnamh á dhéanamh ar phíosa reachtaíochta ar bith, ní mór don Uachtarán a bheith airdeallach ar Airteagal 34.3 Bhunreacht na hÉireann, a deir nach féidir le Cúirt ar bith bailíocht na reachtaíochta a cheistiú tar éis don Uachtarán an reachtaíocht a chur ar aghaidh go dtí an Chúirt Uachtarach.
Le cinneadh an Uachtaráin an bille a shíniú inniu, ní chuirtear bac ar shaoránach ar bith agus iad ag iarraidh forálacha an Bhille a cheistiú amach anseo.