Rinne an tUachtarán Ó hUigínn tús na Bliana Idirnáisiúnta Folláine Plandaí 2020 a chomóradh trí chrann a chur i bPáirc an Fhionnuisce i mBaile Átha Cliath.
Tá an Eagraíocht Bhia agus Talmhaíochta (EBT) de chuid na NA tar éis an bhliain 2020 a roghnú chun feasacht a ardú faoin gcaoi ar féidir le cosaint folláine plandaí cuidiú le deireadh a chur leis an ocras, an bhochtaineacht a laghdú, an timpeallacht a chosaint agus an fhorbairt eacnamaíochta a spreagadh.
Is plandaí atá in 80 % den bhia a ithimid, agus táirgeann siad 98% den ocsaigin a análaímid. Ach ag an am céanna, bíonn siad faoi bhagairt sheasmhach agus mhéadaitheach ó lotnaidí agus ó ghalair. Tá éiceachórais á n-athrú ag an athrú aeráide agus ag gníomhaíochtaí an duine, an bhithéagsúlacht á laghdú agus dálaí á gcruthú inar féidir le lotnaidí maireachtáil go rábach. Ag an am céanna, tá méadú faoi thrí tagtha ar thaisteal agus ar thrádáil idirnáisiúnta, agus is féidir lotnaidí agus galair a scaipeadh ar fud an domhain agus damáiste mór do phlandaí dúchasach agus don timpeallacht a bheith ann dá mbarr.
Is téama buan ar feadh Uachtaránacht Mhichíl D. Uí Uigínn atá sa tábhacht a bhaineann le plandaí, an fiadhúlra agus ár gcomhshaol nádúrtha a chosaint. Tá béim ar leith leagtha ag an Uachtarán ar an tionchar atá ag an athrú aeráide gan srian, agus é ráite aige go dtabharfar breithiúnas ar an tsochaí chomhaimseartha leis an gceist “ar iompaíomar na súile ó leochaileachtaí ár bpláinéid ....nó an raibh an chomhbhá againn chun ár n-idirspleáchas a cheiliúradh”.
Anuraidh rinne an tUachtarán Ó hUigínn iniúchadh iomlán ar an mbeathra plandaí agus ainmhithe i dtailte Áras an Uachtaráin a choimisiniú, agus é mar aidhm aige pleananna a fhorbairt chun an bhithéagsúlacht ar an talamh thar timpeall theach cónaithe Uachtarán na hÉireann a chosaint níos fearr.
