Ráiteas ón Uachtarán Ó hUigínn ar chúrsaí sa Mheán Oirthear
Dáta: Sat 5th Dei, 2024 | 14:50
"Mí lán de bhriseadh croí agus de bhrón is ea mí Dheireadh Fómhair do go leor teaghlach.
San áireamh anseo, tá na daoine neamhchiontacha sin, an oiread sin acu ina ndaoine óga, a maraíodh go huafásach agus iad ag freastal ar fhéile cheoil Supernova Sukkot Gathering in Iosrael ar an 7 Deireadh Fómhair, chomh maith leis na daoine eile a mharaigh, agus a ndearna Hamas ionsaí orthu, na gialla a cuireadh i ngéibheann, agus imní a dteaghlach. Is í sábháilteacht a muintire an chloch is mó ar a bpaidrín acu.
Níor cheart go mbeadh an pointe seo sroichte againn. Níl áit ar bith ann do na heachtraí uafásacha a lean eachtraí an lae sin ach an oiread, le pionós, díoltas agus dochar fulaingthe go forleathan, nó, mar shampla scriosadh oideachais agus sláinte na leanaí.
Tá sé chomh tábhachtach nach gcuirfimid a thuilleadh leis an gcailliúint agus leis an gciorrú beatha a tharla i mí Dheireadh Fómhair seo caite agus sna míonna ó shin i leith.
Faoi láthair, mar Cheannasaí Uachtarach ar Óglaigh na hÉireann, agus mar atá gach saoránach Éireannach is dóigh liom, táim ag smaoineamh ar an am imníoch atá ann dóibh. Tá baill d’Óglaigh na hÉireann i mbaol a mbeatha, agus tá a dteaghlaigh ag déanamh an íobairt seo, ar son sibhialtach atá gan chosaint i sráidbhailte theas na Liobáine. Smaoinímid go laethúil orthu go léir agus ar a thábhachtaí atá a sábháilteacht agus a soláthairtí.
Tá meitheal na hÉireann de 347 mar chuid de leithdháileadh 10,000 saighdiúir UNIFIL. Tá sé go hiomlán scannalach go bhfuil Fórsaí Cosanta Iosrael tar éis bagairt a dhéanamh ar an bhfórsa síochánaíochta seo agus go ndearna siad iarracht bata agus bóthar a thabhairt dóibh ó na sráidbhailte atá á gcosaint acu. Go deimhin, tá Iosrael ag éileamh go n-imeoidh UNIFIL, a oibríonn faoi shainorduithe na NA, ina iomláine.
Ní hamháin gur masla é seo ar an institiúid dhomhanda is tábhachtaí, a bhfuil 193 ball tiomanta aici, ach is masla é freisin do na saighdiúirí agus dá dteaghlaigh a chuaigh i mbaol ionas go mbeimis go léir ag maireachtáil faoi shíocháin agus go mbeidh cosaint ag an té is leochailí.
Táim cinnte go bhfuil an misneach atá á léiriú ag ár meitheal agus ar á gcomhghleacaithe i smaointe agus i bpaidreacha na ndaoine sin ar fad a bhfuil meas acu ar an tsíocháin, sa bhaile agus i gcéin.”